Rîyê eşkerayîyanê paştdayîşî ra Salar Taherafşarî rê cezayê hepsîye
Cezaya hepsî ya aktîvîstê komelê sîvîlî Salar Taherafşaro ke Îran de Zîndanê Evînî de tepişte yo, bi bahaneyê ke ey eşkerayîyê ke seba paştdayîşê tepişteyanê sîyasîyan ameyê weşanayene îmza kerdê, vejîyaye şeş serran.
Cezaya aktîvîstê komelê sîvîlî yê azerbaycanijî Salar Taherafşaro ke Îran de Zîndanê Evînî de tepişte yo, bi qerarê Şubeyê 26. yê Mehkemeya Şorişî ya Tahranî ameye zêdekerdene. Bi qeraro newe cezaya hebsî ya Salar Taherafşarî vejîyaye şeş serran, qedexeyê vejîyayîşê teberê welatî zî vejîya hîrê serran.
Waya tepişteyê sîyasîyî Salar Taherafşarî Sudabe Taherafşar eşkera kerd ke serê qerarê panc serran cezaya hepsî û yew serre qedexeyê vejîyayîşê teberê welatî yo ke verê cû dîyabî birayê ci, yew serra bîne cezaya hepsî û di serrî zî qedexeyê vejîyayîşê teberê welatî yê zêde dîyayî ci.
Bi nê hawayî cezaya Salar Taherafşarî ya pêroyî sey şeş serrî hebs û hîrê serrî zî qedexeyê vejîyayîşê teberê welatî bîye qetî. Eşkerayîyê paştdayîşî yê seba tepişteyanê sîyasîyan sey bahane ameyî mojnayene. Goreyê qerarê Şubeyê 26. yê Mehkemeya Şorişî ya Tahranî yo ke binê serekîya Dadger Afşarî de dîyayo, zêdekerdişê cezaye rê; îmzakerdişê eşkerayîyanê ke seba paştdayîşê tayê tepişteyanê sîyasîyan yê sey Şerîfe Muhemedî, Pexşan Ezîzî, Werîşe Muradî û Sumîye Reşîdî ameyê weşanayene, sey bahane ame mojnayene.
No qerar, yew wexto ke rêxistinê heqanê merdiman, mehkemekerdişê aktîvîstanê komelê sîvîlî yê rîyê paştdayîşê bi tepişteyanê sîyasîyan û şuxilnayîşê azadîya îfadeyî ra reyna rexne kerdêne de gêrîya. Xebara zêdekerdişê cezaya Salar Taherafşarî, eynî wextê xebaranê qutbîyayîşê hîrayê yê qiseykerdişê telefonî yê tepişteyanê Zîndanê Evînî û birnayîşê îrtîbatê tayê tepişteyan yê bi keyeyanê înan de ameye rojeve. Nê averşîyayîşî, derheqê rewşa tepişteyanê sîyasîyan de endîşeyê keyeyan û pawitoxanê heqanê merdiman zêde kerdî.
