KJAR ra vengdayîş: Bêrê ma bibê vengê cinîyanê Afganîstanî!

Komeleya Cinîyan ê Azadan ê Rojhelatê Kurdîstanî (KJAR) bi yew eşkerayîye polîtîkayê zextkerî yê Talabanî yê vera cinîyanê Afganîstanî bi tundî şermezar kerdî û peyamê paştdayîşî da.

KJAR’î eşkerayîya xo de dîyar kerd ke Rojhelatê Mîyanênî nika tarîxê xo de dewrêkê zaf hesas û krîtîkî ra vîyareno ra. KJAR’î da zanayene ke nê prosesê alozî de cinîyî vurîyayîşê komelkî û sîyasî de rolêko bewlîkerde kay kenê.

"Zihnîyetê Îran û Talabanî eynî yo"

Eşkerayîye de bale ameye ser antene ke Talaban wazeno bi qedexekerdeyîşê perwerde û heqê xebityayîşî, cinîyan teberê cuya komelkî de verdiyo. KJAR’î eynî wext de dîqat ant îdam û zextê asayîşî yê ke Îran de zêdîyayî ser û vat: "Nizdîbîyayîşê rejîmê Îranî û Talabanî yê vera cinîyan seyyewbînan o. Nê wird awanîyê sîyasîyî wazenê ke bi zext û kontrolê serê cinîyan, estbîyayîş û îqtidarê xo bidomnê."

Sîmgeyê xoverdayîşî: Jin, Jiyan, Azadî

KJAR’î da vîrkerdene ke slogana "Jin, Jiyan, Azadî" hemverê nê polîtîkayanê zextî de bîya sîmgeyê xoverdayîşê cinîyan. Eşkerayîye de ame vatene ke na slogane herême de seba newe ra pênaskerdişê azadîye, seypêyîye û edaletî rolêko gird kay kena.

Peynîya eşkerayîye de KJAR’î veng da pêro hêzanê ke azadîye wazenê, dezgehanê komelê sîvîlî û pawitoxanê heqanê merdiman ke vera polîtîkayanê hêrişkaran ê Talabanî bêveng nêmanê û paştî bidê cinîyan ê Afganîstanî.