‘Gerek serûberkerdişan de heqê hêvî zî bêro caardene’
Pawitoxê Rayber Apoyî Îbrahîm Bîlmezî ard ziwan ke serûberkerdişê ke do verê qefilnayîşê meclîsî bêrê kerdene gerek heqê hêvî zî tede bêro caardene.
Pawitoxanê Buroyê Huqûqî ra Îbrahîm Bîlmez derheqê heqê hêvî de ANFyî rê qisey kerd. Bîlmezî ard ziwan ke qerarê heqê hêvî yê Mehkemeya Heqanê Merdiman a Ewropa ke 2014î de ame girewtene 12 serrî xo dima verdayî û vat Komîteya Wezîran a Konseya Ewropa verê polîtîkaya wextîravilakerdişî ya Tirkîya akena.
Bîlmezî îfade kerd ke ê cehd kenê ke dosyaya Rayber Apoyî do aşma eylule de newe ra bifînê rojdemê Komîteya Wezîran û vat çareserîya meseleya kurdan û demokratîkbîyayîşê Tirkîya yewbînan ra cîya nîyê.
Bilmezî ard ziwan ke Rayber Apo semedê çareserîya meseleya kurdan aktorêko muhîm û vat nê prosesî de ke dewam keno gerek gamê pêtî ke bawerîye zêdînenê bêrê eştene. Bilmezî îfade kerd ke hetê kurdan çarçeweya vengdayîşê Rayber Apoî de gamê muhîmî eştî û vat vera nê hukmatî serûberkerdişê qanûnî yê ke hewce kenê nêardî ca.
Bîlmezî bale ante tecrîdo ke Îmrali de yeno domnayene ser û vat: ''Goreyê ruhê prosesî gerek şertê Birêz Ocalanî bêrê holkerdene. Serûberkerdişê ke rojdem de yê ke verî ke meclîs bêro qefilnayene bêrê vetene, gerek mîyanê înan de ca bidîyo heqê hêvî zî. Bi caardişê heqê hêvî proses do bêro xurtkerdene û averberdene.''
